「會社媽」傳奇－陳綉燕

    明天啟元年顏思齊來台屯墾，建內十寨、開發笨港及設外十莊(外十寨)，蒜頭(有九萬二七千之美稱，家有萬兩以上9戶、千兩以上有27戶，算是頭等富有的地區，故稱算頭，後引用同音蒜頭為地名至今)鄰近大小槺榔、雙溪口(外七寨)、猴樹港與溪厝(外九寨)及土獅仔、六家佃(外十寨)等外三莊，由於移民不斷擁入，讓蒜頭更加速繁榮。

出生於水林鄉水北村，為鄉土文學作家，平時在雲林縣、嘉義縣等國中小擔任台語鄉土教學老師，著有「幸蝠情夜婆夢」台語繪本，由雲林縣政府101年3月15日出版。

    以陳綉燕的台語鄉土創作－會社媽傳奇，來與大家分享，同時了解甘蔗在台灣發展淵源，自明鄭時期、荷治時期、清治時期、日治時期與民國時期等，對台灣開發史佔了非常重要的地位。

會社媽傳奇

陳綉燕

嘉義縣六腳鄉的蒜頭糖廠內底，有一座會社媽，是咱台灣唯一佇會社內面設有廟宇的糖廠，聽阮阿媽聽講是：佇日治時期，日本人為著欲感念媽祖婆降服妖魔作怪的「烏狗精」所起造的。

伊講蒜頭糖廠，佇明治44年（西元1911年）時，日本人佇蒜頭起糖廠的過程當中，時常攏會無緣無故就發生意外，毋是工人受重傷，就是機械故障，發生的原因攏真奇怪，工事一直進行袂順序。

佇蒜頭糖廠開工彼一工，嘛隆重舉辦盛大的開工儀式，無疑悟即動工就發生重大的事故！明明進前安裝甲真妥當，檢查過檢查的機械，開關一揤，電表隨跳掉。日本的工頭就懸下咧檢查，較巡攏捎無總，急甲心狂火熱是大粒汗細粒汗，這時陣一股奇怪的力量共伊捙落來。日本工頭雄雄對頂懸哀叫一聲，噗！倒摔向重重摔落塗跤兜，腦振動閣斷幾若支髕仔骨人受重傷，在場的人攏足驚惶。

代誌發生了後，地方就風聲嗙影講是有歹物仔，有人講是魔神仔，有人講是一隻烏狗精咧作怪，講甲規个糖廠是驚驚惶惶。一个佇廠內做散工，較有頭面的在地人就大膽共日本人提議，愛迎請樸仔跤媽祖鑾駕到糖廠坐鎮除妖。

起頭仔，日本頭人猶感覺台灣人無啥智識，閣會「講一个影，生一个囝」，無共信篤。尾手，看著工場內底的意外，一層一層連捷咧發生，卻是變無步，佇六神無主之下，姑不而將破例，照在地的禮數，迎陣頭到樸仔跤街仔，恭請媽祖婆金身來到糖廠坐鎮，設香案獻上香花果品，逐家焚香祈求媽祖大展神威，保庇工廠動工順利如意四時平安。

過無偌久，乩童起乩佇糖廠工場內，跤踏連花步，手攑的七星劍，看捌的人就講媽祖附身佇乩童身上，行對烏狗精蹛的穴，就佇塗跤畫一个圓箍仔。

    紲落去，乩童手所攑的七星劍就開始挖，閣開金口指點日本頭人準備一鼎燒滾滾的油。閣再繼續請在地有頭面的人鬥挖，無偌久，就挖出一堆發金的烏狗骨，乩童即時將發金的烏狗骨掞落去油鼎糋。

從此以後，意外事故就毋捌閣發生，糖廠員工就真安心做工課，工課嘛足順手矣。樸仔跤的媽祖婆正港是興甲會食糕仔，掃除妖魔作怪的烏狗精了後，這件神威顯赫的聖蹟喙接喙耳接耳傳甲一世界，轟動一時。

明治45年彼當時工廠的工務係長布施龍太郎，為著感念媽祖降服妖魔的聖德，就共工廠佮村長參詳，由糖廠提供場地佮建材，欲佇員工宿舍邊仔起造廟宇，共樸仔跤「配天宮」的媽祖婆，分靈到蒜頭糖廠來予逐家參拜，保佑廠內佮員工、家眷大細平安。

媽祖廟落成的時，工務係長布施龍太郎閣親身號名做「副配天宮」，這久蒜頭糖廠的「副配天宮」猶閣佇咧，也是咱台灣獨一無兩的「會社媽」，到今將近一百年嘍。